217

لاہور: چاہ میراں بازار میں کورونا وائرس کے 17 مریض رپورٹ، پورا علاقہ سیل

لاہور: شہر میں کرونا کے وار جاری ہیں۔ چاہ میراں بازار مکھن پورہ میں 17 مریض رپورٹ ہونے پر پورا علاقہ ہی قرنطینہ میں تبدیل کرتے ہوئے سیل کر دیا گیا ہے۔ کورونا کیسز سامنے آنے پر چاہ میراں کے علاقے کو سیل کرتے ہوئے اس کے داخلی اور خارجی راستوں پر پولیس اہلکاروں کو تعینات کر دیا گیا ہے۔ ضلعی انتظامیہ کے افسران نے سیل کئے گئے علاقے کا جائزہ لیا۔ ذرائع کے مطابق علاقے کے 154 گھروں کو سیل کرتے ہوئے مارکیٹس بھی بند کر دی گئی ہیں۔ اسسٹنٹ کمشنر تبریز مری کا کہنا ہے کہ سو فیصد لاک ڈاؤن کے بعد پچاس سے زائد افراد کے کورونا ٹیسٹ کے سیمپل لئے گئے جس کے بعد پازیٹو کیسز سامنے آنے پر علاقے کو سیل کیا گیا ہے۔
دوسری جانب لاہور میں سمن آباد کے علاقے سکندریہ کالونی میں بھی کورونا وائرس کے کیسز سامنے آنے کے بعد ضلعی انتظامیہ نے کنٹرول سنبھال لیا ہے۔
انتظامیہ کی جانب سے سکندریہ کالونی کو ریڈ اور یلیو زون میں تقسیم کر دیا ہے۔ اس حوالے سے اسسٹنٹ کمشنر تبریز مری نے بتایا کہ سکندریہ کالونی میں کورونا کے نو مریض سامنے آئے جس کے بعد وہاں پر 80 سے زائد افراد کے ٹیسٹ کیے گئے ہیں۔
جبکہ کورونا وائرس کی روک تھام کے لیے آئی جی پنجاب نے بڑا فیصلہ کرتے ہوئے کہا ہے کہ قرنطینہ سے کسی کے بغیر ٹیسٹ فرار ہونے پر ڈی پی او اور سی پی او فارغ ہونگے۔ افسران کو جاری مراسلے میں کہا گیا ہے کہ کارروائی کیلئے سفارشات سٹیبلشمنٹ ڈویژن کو بھجوائی جائیں گی۔ تمام افسران روزانہ کی بنیاد پر رپورٹ آر پی اوز اور آئی جی پنجاب کو بھجوائیں۔

اس خبر پر اپنی رائے کا اظہار کریں

اپنا تبصرہ بھیجیں